آلـفيـة بـن إبـراهـيـم الـأبـجـديـة ..}~

السلام عليكم ..

نبشت أوراقي فـ وجدت لكم هذه القصيدة المتواضعة التي أعتبرها بطاقتي الشخصية .. ولا أبالغ إن قلت من فهم أبياتها فهمني ..

إيضاح / كتبت الأبيات (( مروبعة )) أيّ 3 قوافي متاشبهة في كل بيت ومتغيرة وقافية رابعة ثابتة في كل القصيدة .
وطبعاً الألفية الأبجدية هي التي تكتب على كل الحروف الأبجدية وقد سار على نهجها الكثير من الشعراء القدامى .

لا أطيل عليكم وأضعها بين كفوفكم تقرؤوها :







ألفٍ أولف بالعنا عدة حروف .. وأكتب قصيدٍ ياصل السمع والشوف
أنا محمد ياهل العرف معروف .. وأرجي غفور الذنب رب البريّة

رب البريّة ياعزيز الجلالي .. أنت الذي خابر وتعلم بحالي
يارب تجمعنا ويصبح حلالي .. وأترك دروب الذنب ويّا الخطية

والباء بليت بحب زين الوصايف .. شفت العنا بحبه وشفت الكلايف
وليتك بحالي يأبـيض العود شايف .. همٍ يصبّحني وهمٍ عشيّة

هم العشيّة بآخر الليل كايد .. إلين شمس الصبح تطلع عوايد
جالس أفكر فيك والشوق زايد .. وأكفكف دموعي وعيني نديّه

والتاء تركت الناس واللي يلومون .. وماهمنّي قالوا ولا هم يقولون
ياجعل منهو لامني بـيوم مدفون .. وتطلع على قبره عشرين حيّة

حيّة كلام الناس أقوى من السم .. ناسٍ تقطّع ناس وناسٍ بنا ذم
لكن تجنبهم ولا تحمل الهم .. هذي نوايا وقيل فيها مطية

والثاء ثبات العقل بآخر سنيني .. وياليت أكمّل بالعمر نص ديني
وألقى منى قلبي بها ضيّ عيني .. ونصبح بدار الحب حنا سويّة

حنا سوية نبني البيت بالساس ..أنا الجسد وأنتي له القلب والراس
وأخفيك في عيني بعيدٍ عن الناس .. وأسقيك كاس الحب مازيّ زيّه

والجيم جرّيت القصايد والألحان ..حتى بكى لي طير من فوق الأغصان
يقول يكفي خِلّك اليوم مابان ..مرّت ثمان أيام ماشفت جيّة

جيّته تطفي من لواهيب شوقي ..ومكانته تبقى بأقصى خفوقي
وحبه كما هالدم يجري بعروقي ..ياحيّ زوله لا لفى حيّ حيّه

والحاء حذاري تذرف الدمع عينك .. ترا دموعك جمرةٍ في يدينك
واكتم لي العبرات لا قلت وينك .. ترا دموعك غالياتٍ عليّه

غالي علي لكن على القلب برفوق .. واحذر يكون القلب بالحب مطفوق
وخلّ الذرابة فيك عقلٍ ومنطوق .. هذي نصايح واعتبرها هديّة

والخاء خويك لا تخونه ولو غاب .. واصحى تخاوي كل خاين وكذّاب
نفّاخ كيرٍ مايجيبون الأطياب ..دنياك هذي يارفيقي رديّة

دنيا رديّة مات فيها الأمانة .. وصار الفخر بالكذب معها الخيانة
والصدق ذابل في اصول الديانة .. عزّو عليها اليوم مع دفع ديّة

والدال دمّي بالحشا فايرٍ فور .. على الظليمة والعنا وقسوة الجور
واحد يشيّد والقوي يهدم السور .. هذي هي الأحوال صارت دنيّة

حالة دنيّة وشعبنا صار مظلوم .. البعض يسرق والبعض يرتجي قوم
والبعض جايع يلبس الهم بهدوم .. والحمد لله بكل روحه وجيّة

والذا ذرفت الدمع باسباب فرقاك .. وحبي مراكب ترجي اليمّ مرساك
ضايع أدوّر بسمةٍ من شفاياك .. والليل ساهر به عيني شقيّة

عيني شقيّة تلحق الدمع بالدمع ..ومن حرّ دمعي ذوّب الخد والشمع
حتى المسامع بالشقى عافت السمع .. وآخر علاج الطب بالنار كيّة

والراء رمتني بالسهم ثم حبـيت .. وتفضحني حروفي اذا عنّه ابطيت
ليته تجيني اليوم ياليت ياليت .. وأقبّل كفوفه وتلمس يديّه

تلمس يديني وتصبح الكف بالكف .. وتنثر سواد الليل بالمتن والكتف
هذا شعرها وانتشي به ولي شفّ .. وتظهر لي أسرارٍ بصدره خفيّة

والزاء زماني شفت فيه العجايب .. شفت الذيابة وشفت منهم زلايب
منهم بعاد الناس ومنهم قرايب .. يغبنك كثرتهم ولا فوق ميّة

يغبنك ميّة ومية ٍ يذكرونك ..تشري مواصلهم وهم يشترونك
تحطهم يمناك بالضيق عونك .. لكن رداهم ارفضه فيك عيّة

والسين سامر من تحبه ويغليك ..ولا شاف دمعك قال يالزّين وش فيك
يسهر معك بالليل صعبة يخلّيك .. حتى مع همومك ما جَتْه نيّة

ماجَتْه نيّة ينقض العهد يازين .. أنتي مكانك داخل القلب والعين
أنتي بخفوقه يالغلا وش تساوين .. أنتي قمر هالكون بالليل ضيّة

والشين شقّ النور ليلي بالاشراق ..والعين بغيابه دمعي لها راق
ونار الضماير حارقه فيني احراق .. وتطويني الأحزان بالشوق طيّة

للشوق طيّة والزمن فيه طيّات .. طيّة ظلام البرد بالليل حيّات
آمنت بالقرآن وصدّقت آيات .. ويارب تكفيني زماني وغيّة

والصاد صبري ياعذابي بدا يذوب .. وقلّ الصبر فيني عذاريب وعيوب
ياليت قلبي بالصبر مثل أيوب .. وانسى عواصيف الزمن ماعليّه

الوقت عاصوفه مثل مسّ جني .. مَا يفيد فيه الحلم وإلا التمنّي
ويلاه ياصوتي أصوت وأوّني .. وشلون أصبر وأطرد الهم فيّه

والضاد ضلعي كنه العود مبري .. وعساك ياسيد المزايين تدري
وافي بوعدي وأنتي اليوم خبري .. ماخنتي الوقفات اصلك وفيّة

أصلك وفيّة بنت ناس وقبيلة .. وابوك مايقبل دروب الرذيلة
فيه الكرم والجود عادة أصيلة .. مايمنع الرجّال يعطي عطيّة

والطاء طلبت الله يخفف همومي .. ويحقق الغايات وأجمل حلومي
ولازلت أنا أدعي بليلي ويومي .. يافارج الكربات مرسل نبيّه

مرسل نبيّه بالعرب صفوة قريش .. بين الشتاء والصيف في رحلة العيش
ماقد عرف منكر ولايعرف الطيش .. وماكان مثل الناس بالجاهلية

والظاء ظلام القبر واللحد مايل .. ونفسك تحاسب نفسها بالفعايل
أيقنت يوم الدين والشك زايل .. وياويل من له نفس كانت عصيّة

نفسه عصيّة ما انحنت يوم طاعة .. وخلّى صلاته يحسب انه شجاعة
بيجيه يوم يزيل وجهه قناعه ..وتصبح ذنوبه والمعاصي جليّة

والعين عيني عافت النوم بالليل .. حتى نحل جسمي ولاعاد بي حيل
ماغير أكتب والقصايد لها أشيل .. مره غزل فيها ومره حميّة

فيني حميّة صوبها كنّها اخت .. وما ارضى عليها بالمهانة ولو شخت
متى الليالي تجمع اثنين يابخت .. فيني لـ عين الزين غيرة قوية

والغين غابت شمسها يوم غابت .. حتى شموعي أنطفت ثم ذابت
عز الله أن الليل بالعين ثابت .. وليلة بها الأحزان لي سرمدية

لي سرمدية مثل سود المجاهيم .. جفت مواردها ولاشافت الديم
ماتصلح لحرثك ولا للمعازيم .. وماتنفعك بالنار طبخه وشيّه

والفاء فديت العين وأفدى نظرها .. لا سلهمت بالليل يخجل قمرها
أهدي لها عمري وهذا مهرها .. ودايم أغني به لحونٍ شجيّة

لحوني شجيّة ماتبي دوم غيره .. هي تجبر الكلمات لا طار طيره
كنّه تقول سواي لا تجيب سيره .. لا بنت جهّالٍ ولا بحظرية

والقاف قافي بكتبه في عمامي .. يمكن أوفّي حقهم بالكلامي
هم باصعب الاوقات شدّة حزامي .. من ديرة الدمام للعوشزية

بالعوشزية عاش ظبي العداله .. لو شاف طايح هب عنده وشاله
ولا عاش رجل ٍ همّل اليوم خاله .. من منفذ الرقعي الى الناصرية

والكاف كفّي تنزع اليوم روحي .. مدري نزعها الهم وإلا جروحي
لو زاد فيها الوجد خايف تروحي .. عز الله إني شفت حبل المنيّة

حبل المنيّة أنوضع فوق تابوت .. وياالله تنجّيني إلى سكرة الموت
يامنجيٍ يونس من غبّة الحوت .. وتصبح مع التوحيد روحي نقيّة

واللام لا تجفين في والدينك .. وبرّي بهم ياجعل ربي يعينك
برضاهم الجنّات وأحلى سنينك .. والله يقدّرني معَ والديّة

في والديني هلّ حرفي بالأمطار .. ويجري لهم شعري كما جري الأنهار
وأدعي لهم دعوة مع الطير لا طار .. يالله تخليهم بهالعمر ليّه

والميم مالي بالمواصل طريقة .. غير الرسايل واتقفى طريقة
واتخيله بعيون كل الخليقة .. خفّي علي بالوصل ياالأجوديّة

ياالأجوديّة بطلب القرب سنّة .. روحي وروحك بالمحبة يبنّه
وترا الوفا بين المحبين جنّة .. ولازم نواصل دوم الأوقات ريّه

والنون نومك ياعسى بالعوافي .. نامي وجفني يسهر الليل وافي
ويشكي على الأوزان والا القوافي .. وكل ما نصحته قال اصبر شويّه

اصبر شويّه يا محمد ثواني .. كلما محيت الهم دمعي قراني
قلبك عليلٍ لازم انك تعاني .. اصبر عساك تعيش عيشة هنيّة

والهاء هوانا مايجينا على الكيف .. مثل المزون الممطرة حزة الصيف
والا كما الضيفان لا حلّ بك ضيف .. فجأة يجيك اليوم من غير نيّة

من غير نيّة ينزل الدمع يابنت .. وحتى خفوقي يسأل الفرْح لا هنت
وينك بطول الوقت يافرْح مابنت .. عجّل ترا بيروح نبضي هبـيّة

والواو ويل القلب بالشوق شاعل .. وصارت به الأشواق مثل المشاعل
وماني لفعل الصد يازين فاعل .. بافعل فعول القيس بالعامريّة

واكتب لك الأبيات وأعذب قصيدي .. وليت الحروف الأبجدية تزيدي
كان أكمْل الألفين وأرجع ازيدي .. ولجلك كتبت ألفيتي أبجديّة

والياء يا رحمن بالخير تممّ .. وعلى النبي المعصوم صلّي وسلم
ياعالمٍ بالغيب يارب تعلم .. في ظاهر الأعمال وإلا الخفيّة

وإلا الخفيّة بالقصايد كتبته .. وبان الذي بالصدر واللي كتمته
وهذي خفايا الروح باللي نظمته .. وتمت بعون الله هادي نبيّه







تحياتي
أخوكم
محمد آل إبراهيم

ملاحظة / أرجو لمن يريد نقلها أن ينقلها بالأسم مشكوراً




..
__________________
..